DE VIÑOS E TURISMO
Achegándote a calquera das cinco Rutas dos Viños de Galicia con Denominación de Orixe poderás facer unha orixinal viaxe en torno á vide e ao viño. Tanto en parella como en compañía da túa familia ou dos teus amigos, propoñémosche un paseo entre viñedos.
As 11as Xornadas de Portas Abertas das Rutas dos Viños de Galicia terán lugar durante cinco fins de semana entre os meses de maio e xuño, de xeito que do 13 ao 15 de maio se celebrarán na Ruta do Viño do Ribeiro, do 20 ao 22 de maio na Ruta do Viño Rías Baixas, do 27 ao 29 de maio na Ruta do Viño de Valdeorras, do 3 ao 5 de xuño na Ruta do Viño da Ribeira Sacra e rematarán na fin de semana do 10 ao 12 de xuño na Ruta do Viño Monterrei.
A celebración destas Xornadas bríndache a escusa perfecta para non demorar máis esta experiencia. Podes optar entre as sobranceiras paisaxes de Monterrei presididas pola súa impoñente fortaleza medieval, as do Ribeiro e súa antiga historia vitivinícola, as das Rías Baixas e os seus pazos e xardíns históricos, as da Ribeira Sacra, cheas de maxia de corte monacal ou as de Valdeorras, territorio de senlleiras covas… Paisaxes que mudan as súas cores e texturas con cada estación do ano.
O ENOTURISMO DE GALICIA NO TEU MÓBIL
A aplicación Enoturismo en Galicia pode descargarse gratuitamente dende as tendas de aplicacións das plataformas iOS e Android. A información proporciónase en galego, castelán e inglés, optando o usuario polo idioma que prefira. Esta ferramenta ofrece información sobre todos os establecementos adheridos ás cinco Rutas dos Viños de Galicia: adegas, destilerías, restaurantes, aloxamentos, empresas de lecer, museos, oficinas de información turística, axencias de viaxes especializadas, enotecas, etc. facilitando deste xeito ao usuario o coñecemento do enoturismo da nosa Comunidade Autónoma. Cada unha das cinco Denominacións de Orixe galegas -Monterrei, O Ribeiro, Rías Baixas, Ribeira Sacra e Valdeorras- son presentadas amosando as características dos seus territorios e dos seus viños. Esta aplicación permite obter unha información precisa de cada recurso xa que automaticamente posibilita realizar unha chamada telefónica, enviar un correo electrónico ou acceder directamente á web propia de cada establecemento, así como tamén ofrece información práctica de como chegar ao mesmo directamente a través de “Google maps”.
EN QUE CONSISTEN AS 11as XORNADAS DE PORTAS ABERTAS?
Durante cinco fins de semana entre os meses de maio e xuño poderás facer visitas guiadas e gratuítas ás adegas participantes nesta promoción. Todas terán as súas portas abertas para ti durante a fin de semana da campaña*. Ao finalizar a visita ofreceranche como agasallo unha degustación dos mellores viños de Monterrei, O Ribeiro, Rías Baixas, Ribeira Sacra ou Valdeorras. Tamén atoparás restaurantes onde poderás escoller entre dous menús concibidos especialmente para esta ocasión. Os menús compoñeranse de primeiro e segundo pratos -maridados ambos con viños da Denominación de Orixe na que te atopes- e sobremesa. Algúns dos restaurantes adheridos tamén ofrecerán menús infantís para os nenos menores de 12 anos que acompañen aos adultos.
En cada Ruta poderás atopar ademais un programa especial de actividades para a fin de semana: autobuses do viño, catas comentadas, visitas a museos, rutas monumentais, paseos en barca, descontos en aloxamentos e outras accións relacionadas co mundo do viño.
*Realizaranse tres visitas guiadas o sábado e unha o domingo co seguinte horario de atención ao público:
Sábado: 11.00 h, 12.30 h e 17.00 h
Domingo: 12.00 h
Recoméndase confirmar a visita vía telefónica coa adega correspondente
MÚSICA E VIÑO: UNHA MARIDAXE EXCEPCIONAL
Ao abeiro das 11as Xornadas de portas abertas das Rutas dos viños de Galicia creáronse cinco composicións musicais orixinais inspiradas en cadansúa denominación de orixe vitivinícola. A personalidade dos viños galegos, a terra da que nacen, a paisaxe que reflicten ou a cultura da que son froito son elementos cos que Ana Rodríguez e Carlos Calviño, compositores galegos, traballaron para compoñer estes cinco temas inéditos que casan con cada D.O. galega. O resultado deste traballo, que conta coa colaboración do enólogo Jorge Hervella, é un conxunto de pezas orixinais que permiten paladear os nosos viños a través dunha senlleira experiencia musical.
RECOMENDACIÓNS EN REFERENCIA Á COVID-19
Turismo de Galicia e as Asociacións das Rutas dos Viños de Galicia asumen o compromiso de cumprimento das medidas preventivas e de seguridade derivadas da actual situación sanitaria en referencia á Covid-19 en todas as actividades programadas. Así, nos Buses do Viño non se ocupará máis do 60 % da súa capacidade, deixando espazo suficiente para manter a distancia de seguridade. Informámoslles que algunhas das actividades previstas na programación de cada Ruta poderanse ver afectadas no seu desenvolvemento ou incluso poderán ser suspendidas por razóns de forza maior.
CONCURSOS
No Facebook de Turismo de Galicia realizaremos tres concursos por cada Ruta do Viño nos que sortearemos en total 15 premios consistentes nunha noite de aloxamento para dúas persoas en cuarto dobre nun dos establecementos asociados participantes máis o xantar do día seguinte nun restaurante socio da Ruta. Sigue as nosas redes sociais e participa!
